عزيزي الزوج المأنتخ
كيف تحصل على كوباية ماية ساقعة
الأدوات المطلوبة :
- كوباية فاضية
- ثلاجة . وطالما قولنا تلاجة يبقي اكيد فيها إزازة ماية على الاقل
الطريقة :
...
وحياة ابوك ...... قوم من مكانك ...... و امشي بثبات و ثقة و إصرار لحد باب التلاجة
ارفع ايدك شوية صغيرين بحكمة وتعقل لحد ما تلمس باب التلاجة . شده .. معلش
هنتعب جنابك ....
ارمي عينك كده علي الرف بتاع أزايز الماية الي في التلاجة
انحناءه بسيطة .. ممكن تاخد نفس عميق قبل التنفيذ لسهولة و تيسير المأمورية
مد ايدك الكريمة ... ايوه .. برااااافو .. شيل الإزازة . يحيمك لشبابك
.. اقفل التلاجة من فضلك
اتجه ناحية الكوباية ... انا عارفة طولت عليك .
افتح يالا بقي الغطا و صب في الكوباية ...
ممكن تسيب الإزازة بره علي فكرة مش لازم ترجع تاني للتلاجة .
تاكسي رايح و تاكسي جاي علي ايه ... سيبها مراتك تشيلها بعدين
تحب اقولك تتشرب ازاي ..
ولا كفاية كدة عليك النهاردة
